Istorgias ord l’istorgia: «Discurrer rumantsch!»

Tgi sa, sch’igl è propi vegnì discurrì BE rumantsch a chaschun da l’ultima radunanza annuala da la Societad Retorumantscha? Pertge quai? L’intent da la societad dal temp da sia fundaziun l’onn 1885 circumscrivan ils statuts da lura. Il paragraf 1 formulescha in scopo: collecziunar e conservar ils monuments dal linguatg rumantsch. Quai vul dir: rimnar documents e scrittiras veglias. Ultra da quai duai vegnir cultivà il rumantsch. Per far quai prevedan ils statuts, edids per puter e sursilvan, mintga quartal ina sessiun da la societad (§ 4) e prescrivan: «Ils nativs Romonschs fan en las sessiuns diever de lur lungatg matern, evitont elements jasters» (§ 10).