Vernissascha da las Annalas 138

Amur en la lirica e tuns dialectals en registraziuns istoricas

Pertge dat la dumonda «Has che morda?» da morder en la linguistica? Co tunass il roman da Cla Biert «La müdada», sch’i fiss in album da musica? Co vegnan temas ecologics tractads en la litteratura rumantscha? Co vegnan tenutas linguisticas areguard il rumantsch grischun reproducidas en la populaziun? Co rinforzar il plaschair da leger tar la gruppa da giuvenils? Tge dunnas han fullà via per las vuschs femininas en la musica dal Grischun? Las Annalas actualas – il nr. 138 da la retscha annuala scientifica da la Societad Retorumantscha – cuntegnan ina vasta paletta dad artitgels scientifics e scientific-populars davart la lingua e la cultura rumantscha.

A chaschun da la vernissascha a Cuira vegn Giuanna Emilia Caviezel, la redactura responsabla per questa ediziun, a dar in’introducziun en questa paletta. Annetta Ganzoni dat in’invista en l’antologia «Amur. Poesias 1648–2025» e Michele L. Badilatti porscha in access a quatter registraziuns rumantschas che dateschan dal 1924, numnadamain cun Chasper Pult da Sent/Son Gagl, Men Rauch da Scuol, da (Gion) Men Collet da Riom/Turitg e cun Felix Huonder da Mustér/Turitg. La musica da Mattiu accumpogna la sairada.

Vernissascha da las Annalas 138. 18:30 en il B12, Brandisstrasse 12, 7000 Cuira. Cun musica da Mattiu. I vegn offert in aperitiv. Per empustar las Annalas: shop.drg.ch