Scienza
La Societad Retorumantscha (SRR) s’engascha, per che la lingua rumantscha vegnia documentada e perscrutada scientificamain. La lingua rumantscha e sia cultura ed istorgia duai vegnir vesaivla, p.ex. en il rom da publicaziuns.
Publicaziuns e perscrutaziun – in forum per lavurs scientificas
La SRR è dapi il 1886 l’editura da las Annalas da la Societad Retorumantscha, in annuari cun contribuziuns linguisticas ed istoric-culturalas. Ultra da quai cumpara la retscha scientifica Romanica Rætica. Cun questas publicaziuns porscha la societad a perscrutadras e perscrutaders che sa fatschentan cun la lingua, la cultura u l’istorgia dal Grischun rumantsch in forum per scuvertas novas, analisas e discussiuns.
Promoziun da la generaziun giuvna – novas vuschs per la scienza
Gronda paisa dat la SRR al sustegn da la generaziun giuvna da scienziadas e scienziads, era per segirar a lunga vista la lavur a l’Institut dal Dicziunari Rumantsch Grischun (IDRG). En las publicaziuns da la SRR han studentas e students la pussaivladad da preschentar lur lavurs ad in public interessà.
Il Dicziunari Rumantsch Grischun – in vocabulari da muntada naziunala
Il Dicziunari Rumantsch Grischun (DRG) è il project da parada scientific da la SRR. Dapi passa tschient onns documentescha la redacziun en l’Institut dal DRG l’entir stgazi da pleds dal rumantsch. La SRR ha la responsabladad per questa ovra – e la renda accessibla a la publicitad sco cudesch ed online.
