Rumantsch sin il cedel da votar

La SRR è s’engaschada ch’ils cedels da votar per projects da votaziun naziunals resguardian er il rumantsch. Entant che broschuras d’infurmaziun e las explicaziuns da la Confederaziun èn disponiblas gia dapi onns en la quarta lingua naziunala, mancava quella fin ussa sin ils cedels da votar.

Cun la votaziun federala dals 28 da settember 2025 è ussa vegnì fatg in pass impurtant: Per l’emprima giada han las votantas ed ils votants da lingua rumantscha en il Grischun survegnì il cedel da votar cun in text er en lur lingua. Quai renda visibel il rumantsch ed al tracta da maniera equivalenta al tudestg, franzos e talian – in segn essenzial da renconuschientscha e participaziun.

L’anteriura chanceliera federala e presidenta actuala da la SRR Corina Casanova ha accentuà en il discurs cun SRF che quest svilup saja «in term impurtant per l’egualitad linguistica». Ella ha suttastritgà che la preschientscha dal rumantsch sin ils cedels da votar n’haja betg mo ina valur simbolica, mabain rinforzia la participaziun da las pledadras e dals pledaders e fetschia visibla a moda concreta la diversitad da la Svizra.