Rapport annual 2024
12 da mars 2025
Il rapport annual 2024 da l’IDRG mussa in onn da la transiziun e da la consolidaziun. Suenter midadas da persunal è la redacziun vegnida rinforzada cun dr. Stefano Negrinelli e Daniel Telli. Quai ha dà in stausch considerabel per l’elavuraziun da novs artitgels en il dicziunari. La versiun online è vegnida cumplettada cun ils artitgels minera – mirar.
Era la biblioteca e la fototeca èn creschidas e cun la digitalisaziun da la collecziun «Aktion Bauernhausforschung» han ins fatg avanzar in impurtant project da lunga durada. La modernisaziun da l’infrastructura dad IT ha pussibilità furmas da lavur pli flexiblas.
En il rom da la lavur publica ha l’IDRG mess novs accents cun il chalender d’advent popular #drg_advent, la seria «Buccadas» en La Quotidiana ed ina preschientscha pli ferma en las medias socialas. Numerusas contribuziuns dal fatg, cooperaziuns e preschientschas ad occurrenzas culturalas e politicas han procurà per dapli visibilitad da la lingua rumantscha. A medem temp restan la finanziaziun a lunga vista e l’augment dal dumber da commembras e commembers in tema central da l’avegnir da l’institut.
