Publicaziuns
Publicaziuns èn in med essenzial, cun il qual la Societad Retorumantscha fa vesaivel ses engaschament per rumantsch. Ellas documenteschan lingua e cultura, dattan spazi a vuschs arrivadas e giuvnas e promovan il barat scientific.
Annalas da la Societad Retorumantscha (AnSR)
L’annuari scientific
Dapi il 1886 cumparan las Annalas, l’annuari da la SRR. Ellas cuntegnan contribuziuns che s’occupan da temas linguistics, litterars, istorics e culturals en connex cun il rumantsch. Las Annalas èn in forum impurtant per artitgels scientifics e documenteschan la perscrutaziun dal rumantsch sur generaziuns. L’annuari ha in’atgna pagina-web: annalas.ch.
Dicziunari Rumantsch Grischun (DRG)
Il grond vocabulari
Il DRG è la publicaziun da coc da la SRR. Dapi il 1939 cumparan ils toms dal dicziunari che cumpiglia il stgazi da pleds da tut ils idioms e dialects rumantsch incl. la lingua scritta. Oz datti ultra da la versiun stampada er ina versiun online ch’è accessibla gratuitamain. Dapli davart il DRG chattais Vus sin www.idrg.ch.
Romanica Rætica (RR)
Ina retscha per temas dal fatg
Sut il titel Romanica Rætica publitgescha la SRR dapi il 1977 monografias, collecziuns dad artitgels e studis spezials davart la lingua, litteratura e cultura rumantscha. La retscha sa drizza surtut a spezialistas e spezialists ed approfundescha temas che na chattan betg il spazi necessari en il dicziunari ubain las Annalas. Ils singuls titels da questa retscha èn disponibels online sin E-Periodica.
Ulteriuras publicaziuns
Sper las publicaziuns menziunadas èsi adina puspè stà pussaivel dad edir ovras grazia a materialias da l’IDRG, p.ex. funtaunas da dretg, in tractat davart chanzuns popularas rumantschas ubain il Lexicon Romontsch Cumparativ. Talas publicaziuns cumpletteschan las stentas da la SRR da promover lavurs scientificas davart la lingua e cultura rumantscha. Ina survista correspundenta chatt’ins qua.
