Davart la Societad
La Societad Retorumantscha (SRR) è l’uniun la pli veglia per la promoziun dal rumantsch. Ses intent principal è la perscrutaziun scientifica da la lingua e cultura rumantscha. Quest intent realisescha ella cun il manaschi d’in institut scientific e l’ediziun dad ovras scientificas.
La fundaziun da la SRR
La SRR è vegnida fundada il 1885 sin iniziativa da Gion Antoni Bühler. Las finamiras èn stadas quellas da rimnar ed edir monuments linguistics rumantschs, da tgirar ils idioms e da promover l’avischinaziun da quels. Plinavant han ins gì l’idea d’in idioticon rumantsch. Cun il sustegn da l’indogermanist Robert von Planta ha la SRR instradà questa ovra il november 1904, cura ch’ella ha tschernì Florian Melcher sco emprim redactur dal DRG. Dapi lura ha la SRR surpiglià en emprima lingia la rolla da la purtadra da l’Institut dal Dicziunari Rumantsch Grischun (IDRG). Questa funcziun è fin oz l’incumbensa principala da la societad.
La significaziun oz
La SRR è ina da las instituziuns las pli impurtantas per la promoziun dal rumantsch. Cun sia lavur contribuescha ella a la percepziun da la lingua sco viva, moderna e relevanta dal punct da vista scientific. En pli s’engascha la SRR per l’intermediaziun da la cultura rumantscha e per la popularisaziun da la scienza.
