Quatter registraziuns rumantschas dal 1924

Michele Luigi Badilatti, Annalas 138 (2025)

Ils 17 da zercladur 1924 ha Wilhelm Doegen (1877–1967), il manader da la partiziun sonora da la Biblioteca statala prussiana a Berlin, envidà quatter Rumantschs, per gronda part sesents giu la Bassa, da vegnir a l’Archiv fonografic da l’Universitad da Turitg per laschar registrar là lur vuschs. Chasper Pult (1869–1939) da Sent/Son Gagl, Men Rauch (1888–1958) da Scuol, (Gion) Men Collet (1878–1932) da Riom/Turitg e Felix Huonder (1886–1960) da Mustér/Turitg han dà suatientscha a quest invit ed han discurrì en il fonograf, recitond (e per part perfin chantond) lur texts rumantschs preparads per questa chaschun.